طفولتي

,طفولتي فالحقيقة مكنتش سعيدة اوي,لأني قضيتها بين اب و ام صارمين, جامدين , مبيعترفوش بالمشاعر و مدراس الراهبات . كنت فيها الطفلة اللي بتحب تحترم نفسها و متتهزقش فبتعمل كل اللي مطلوب منها باجادة تامة.بس من وانا صغيرة كدة عودت نفسي علي عادة اني مهما كان اللي بعمله لازم احبة .اي حاجة تحصلي او تبقي مفروضة عليا افضل ادور علي الحلو اللي فيها ايه و احبب نفسي فيها… ماما كانت محملاني المسؤلية و خاصة مسؤلية اخواتي.فاتولد عندي شعور بالمسؤلية من وانا صغيرة. و اتولد منها صفة القيادة . ازاي اخلي اخواتي ينفذوا كل اللي مطلوب منهم بحب و عن طيب خاطر.

اكتر حاجة كنت بحب اعملها الرقص لدرجة كنت انا و اختي الصغيرة كنا بنألف رقصات و كنا مسمين نفسنا فرقة علي رضا.هههههه. و كمان كنت بحب القراية جدا و خاصة الروايات عشان كنت بحب اسرح بخيالي مع نفسي.

يا تري ايه اللي حصل بعد الثانوية العامة؟

لما جبت مجموع فثانوية عامة طبعا مسألتش نفسي انا عايزة ايه ,رغم اني كان نفسي جدا ادرس بالية أو أدرس لغات ,بس شوفت اهلي عايزين ايه و دخلت صيدلة.

و زي ما عودت نفسي,ادور عالحلو فالحاجة اللي بعملها عدت الكلية و كمان طلعت من الاوائل... .فالكلية اكتشفت حاجات فيا زي مثلا اني الناس بتثق فيا جدا و بيجوا يحكولي أدق التفاصيل في حياتهم و بيحبوا ياخدوا رائيي .كانوا بيقولولي انهم بيحسوا بالاطمئنان معايا و كمان كانوا بيحبوا اوي طبطتي عليهم.و كتير كنت بساعدهم انهم لما يفكروا,يفكروا بفكر مستنير,بعيد عن المألوف.لأني مؤمنة من زمان انه كل واحد لية حتة بتميزه....كنت بقولهم اني حاسة انه ربنا خالقني لحاجة اكبر من اني اكون صيدلانية و بس....كنت بقعد اقولهم مش مهم نظرة المجتمع ليا عاملة ازاي, المهم انا هكون سعيدة ازاي .... واني مش لازم اعيش بنفس الفورمة اللي كل الناس عايشة بيها ...كانوا بيتريقوا عليا و يضحكوا و يقولولي بكرة نشوف.

كمان كنت بحب اقعد اشرحلهم المواد الغلسة و اقعد ابسطهالهم.

و انا بدرس كنت بشتغل فالصيدليات ,و كنت بحب الشغل جدا و معنديش مشكلة اقعد بعد الشغل بالساعات من كتر حبي فية.

بعد ما اتخرجت اشتغلت فشركة أدوية و كانت اسوأ فترة عدت عليا مستحملتش سنة و قدمت استقالتي برغم اني كنت شاطرة جدا فشغلي و أترقيت مرتين فالسنة دي و دا عشان انا معودة نفسي" حب ما تعمل."

ورجعت تاني الصيدليات و عشت اجمل ايام حياتي لحد ما خلفت بنتي الكبيرة.

اللي كنت بحبة فشغل الصيدلية الناااس . كانوا برضة بيحسوا بالاطمئنان معايا .فبالتالي يقعدوا يحكولي علي مشاكلهم .وكنت بقعد اطمنهم و اديهم امل. و ساعات كتير كنت بقعد اشرحلهم بطريقة بسيطة المرض اللي عندهم وازاي الدوا هيشتغل و يخفوا.فدا كان بيطمنهم و يريحهم."ربنا يريح قلبك يا دكتورة زي ما ريحتي قلبي"أحلي مرتب كنت بقبضة من الناس.

رك

قرار اعتزالي

اول ما خلفت بنتي الكبيرة,قعدت فالبيت عشان اركز معاها و فظرف تلات سنين,كان معايا تلات اولاد و بما انه زوجي بيسافر كتير شيلت المسؤلية كلها لوحدي.ونسيت نفسي.عشر سنين قفلت عليا كل منافذ الهوا.بطلت اعمل كل حاجة بحبها,نسيت خالص اني بني ادمة ليا طلبات اهملت فحق نفسي كتير وزني زاد جدا ,وصلت ل105 كيلو و مخي صدا.و كانت علاقتي بزوجي بدأت تسوء جدا.

نقطة التحول

وصلت لمرحلة اني فعلا كرهت نفسي و حاوطت نفسي بناس كان كل وظيفتهم انهم يشدوني لتحت اكتر.لحد ما في يوم حسيت انه كفاية كدة و اني استاهل احسن من كدة بكتيير.قعدت فكرت ايه اول حاجة اعملها عشان ابدأ ارجع لنفسي. لقيت الخسسان بس مكانش معايا فلوس اروح لدكاترة و انا محتاجة اخس 35 كيلو.وبدأت الرحلة الشغل علي نفسي و بنفسي.اجرب وصفات اكل صحي و اخترع و اجرب ساعات كتير كنت بقع عشان كنت برضع بس بقيت اطبطب علي نفسي و اقومها و اكمل حطيت اهداف صغيرة و قسمت ال 35 كيلو علي السنة و قلت اني محتاجة انزل 2-3 كيلو فالشهر و لو شهر وقع مني مش مشكلة احنا ورانا ايه .و بدأت ادعبس علي فيديوهات رياضة بس بسيطة و سهلة و انا فالسكة و بدعبس و لما بدات اخس و لقيتني بدات احبني حسيت اني عايزة كمان اشتغل علي مخي اللي صدا.و كمان عايزة اظبط علاقتي بجوزي.و اعرف ازاي اربي ولادي . بدأت اقرا و ادور علي كورسات .و كل ما امشي فالسكة حياتي تنور اكتر. و دا ينعكس علي تعاملاتي مع اللي حواليا و اكتشفت السر . اكتشفت انك لما تفهم نفسك كويس و تحتويها و تطور منها هتتغير للاحسن و دا هيخلي علاقتك باللي حواليك كمان تطور للاحسن. بس اهم حاجة انك تتحمل مسؤلية حياتك.

نقطة تحول تانية

كل دا كان جميل اوي لحد ما واحدة صاحبة اختي لقيتها بتعمل كورسات عن الدفاع عن النفس و هي اصلا مهندسة .قعدت وراها لحد ما عرفت ايه السبب اللي خلاها تسيب الهندسة و تتفرغ للحاجة اللي بتحبها.

عرفت حاجة اسمها باشون تو بروفيت. و دا نظام بتعرف فيه شغفك و تتعلم ازاي تعمل منه منتج تخدم بيه المجتمع.

.و كان أول مرة أعرف اني ممكن أحلم و انه ممكن حلمي يتحقق. أول مرة أسأل نفسي هو انا بحب ايه , شاطرة في ايه ,أول مرة أسأل نفسي يا تري ايه الصفة اللي ربنا ميزني بيها .أول مرة أعرف أني ليا رسالة و واجب ناحية المجتمع اللي حواليا.أول مرة أعرف انه ربني خلقني لسبب.و ساعتها بس فهمت هو انا ليه عديت بكل التجارب دي في حياتي.

أنا لقيت شغفي حاجتين الرقص بكل انواعه و التحفيز.

فكرت انه الرقص مش هينفع لأني محجبة .... بس افتكرت ازاي كنت بحفز اخواتي و زمايلي فالكلية و كمان الزباين فالصيدلية و ازاي كانوا بيحسوا معايا بالامل و الاطمئنان .بس مكنتش عارفة انا هعمل دا ازاي....لحد ما افتكرت حبي للاذاعة و انا فالمدرسة و كمان افتكرت السنة اللي اشتغلت فيها مدرسة كيميا للطلبة بتوع الامريكان دبلومة ؟.و اد ايه فخلال سنة واحدة بس عن طريق التدريس اكتسبت حب و احترام و ثقة الطلبة.المدرسين كانوا مستغربين ازاي هما اللي بقالهم سنين معرفوش يوصلوا للي وصلته مع الطلبة.

ساعتها قلت بس الباشون هي:

motivational speaking.

و قررت انه التجربة اللي عديت بيها و اللي لسة ماشية فيها انقلها للستات و اصحي قلوبهم اللي نامت من زمان و استسلموا لضغوط الحياة.قررت أكون كشاف ينورلهم العتمة اللي في حياتهم و يحسسهم انه فيه أمل.قررت أقولها انك مش بس تقدري ترجعي زي زمان ,لا انتي تقدري تكوني نسخة احسن من زمان.....بس انتي قرري

بدأت الشغل علي الصفحة و مبسوطة من تفاعل الستات عليها.وبفرح اوي لما يقولولي انه كلامي نور حاجة عندهم او فرق معاهم و كمان بفرح بالناس اللي معرفهاش لما تقولي انه فيديوهاتي بتفرحهم و تحسسهم انه فيه أمل.

نقطة تحول تالتة

بس الحقيقة حصلت حاجة غريبة و انا ماشية فسكتي. لسة الرقص واكل دماغي .و اكتشفت دا لما بدأت الزومبا كلاس لأني مقررة اني أعمل كل حاجة بحبها....الحقيقة هوصحي فيا حبي للرقص و اللي خلاني انتبة اكتر للموضوع دا, تعليق المدربة عليا.هيام بتعيش مع الموسيقي اوى لدرجة انها ممكن تألف حركات مختلفة عني بس ماشية أوي مع الموسيقي .و أصبح كلاس الزومبا افيونة ليا و يمكن الساعة الاسبوعية دي هي اللي بتظبطلي الاسبوع كلة.و اكتشفت اني لما ببقي زعلانة أوي برقص و لما ببقي فرحانة أوي برقص.

الحقيقة انا سعيدة باللي وصلتله في سكتي و لسة الرحلة مخلصتش و اعتقد انها عمرها ما هتخلص طول ما قلبي لسة بيدق و بعمل الحاجة اللي بحبها....

و بعد ست سنين في رحلة التغيير ,حطيت كل اللي اتعلمته في سيستم او نظام سميته

CAD:clarity,acceptance and appretiation,and development(growth)

النظام دا بيساعد كل ست انها تتعرف علي نفسها من اول و جديد و تعيد اكتشاف قدراتها و تحدد اهداف لحياتها .النظام دا بيساعد كل ست انها ترسم و تلون حياتها بالشكل اللي هي عايزاه حتي و هي زوجة و ام و وراها مسؤليات.النظام دا بيساعد كل ست انها توصل للسر........ سر السعادة

الدرس اللي اتعلمته فالسكة انك انتي الوحيدة اللي هتحددي انتي عايزة تكوني ازاي ,مش الظروف ولاالناس اللي حواليكي .....انتي الوحيدة صاحبة القرار.......سعادتك قرارك

All Posts
×

Almost done…

We just sent you an email. Please click the link in the email to confirm your subscription!

OKSubscriptions powered by Strikingly